Pregunta mas hasí

Naturalmente tin hopi pregunta tokante OZB i su aplikashon.

Den e rubriká aki nos ta publiká e preguntanan ku mas ta ser hasí i e respektivo kontestanan ku Inspektor tin riba kada pregunta. Den algun kaso e kontesta ta referí na un teksto en partikular ku tin riba e website. Lo selekshoná i kambia e preguntanan regularmente a base di e kantidat grandi di preguntanan ku mas tantu ta risibí.

Bo tin mas pregunta?

Anto mira aki pa tuma kontakto.

Pregunta mas hasí

Pregunta

Kon ta paga OZB i riba kiko?

Si bo ta doño di un tereno ku tin un konstrukshon riba esaki (kas òf edifisio/ofisina etc.), bo ta paga OZB riba e balor di e tereno i e balor di e konstrukshon. Si bo ta doño di un kas ku bo a konstruí riba un tereno di hür (huurgrond), ku ta propiedat di Kòrsou, bo ta paga OZB solamente riba e balor di e kas. Si bo tin un kas konstruí riba erfpachtgrond, bo ta paga OZB riba balor di tantu e tereno komo e kas huntu.

Si un konstrukshon ta riba huurgrond pa OZB ken ta doño di esaki?

Segun derechi sivil e doño di e tereno ta doño di e konstrukshon. Pa evitá ku no ta paga OZB riba kasnan ku ta konstruí riba tereno hür (huurgrond) di Kòrsou, a regla den lei ku e doño di e kas lo paga OZB riba e balor di e kas so. Esaki pa motibu ku propiedat ku ta di Kòrsou ta haña eksonerashon. Lo no tene kuenta ku e balor di e tereno.

Na unda mi por akudí ku mi preguntanan?

Via e website aki bo por manda bo preguntanan via mail. Nos lo kontestá bo mas pronto posibel (bo por haña e formulario pa manda mail un otro kaminda den e rúbrika aki). Durante oranan di ofisina bo ta bon biní ku bo preguntanan na bali di informashon na Inspectie, situá na Regentesselaan. Nos ta alkansabel tambe telefónikamente.

Kiko e tarifa di OZB ta?

OZB konosé un tarifa progresivo ku ta varia dependé e balor di e propiedat. Pa e promé NAf. 350.000,00 bo ta paga 0,4% impuesto riba e montante aki. Pa un propiedat entre NAf. 350.000,00 i NAf. 750.000,00 bo ta paga un impuesto di NAf. 1.400,00 i 0,5% adishonal pa kada montante ku surpasá NAf. 350.000,00. Pa un propiedat mas tantu ku NAf. 750.000,00 bo ta paga un impuesto di NAf. 3.400,00 i 0,6% adishonal pa kada montante ku surpasá NAf. 750,000,00.

Tin propiedat ku ta haña dispensashon di OZB?

Pa esaki nos ta referí na e parti Dispenshashon bou di e rubriká “lei i tarifanan” den e site aki.

Kiko ta taksashon?

Taksashon di OZB ta enserá stipulashon di e balor di un propiedat dor di un eksperto. Punto di salida ta ku e eksperto mester balotá e montante ku un pagadó di belasting lo por risibí ora e bende su kas ku un tersero. Ku kondishon ku e doño nobo lo por hasi uso inmediatamente di e propiedat. Pues no e balor den kondishon di hür pero e balor na entrega.

Kiko mi por hasi si mi no ta di akuerdo ku e balor di e taksashon?

Na promé lugá e pagadó di impuesto ta risibí un karta ku menshon di e balor stipulá despues di taksashon. Si bo no ta di akuerdo ku e balor aki bo por duna Inspectie di konosé esaki pa medio di un karta di opheshon. Nos ta referí aki na e splikashon ku tin riba e site. Esun responsabel pa paga e impuesto ta haña algun siman di tempu pa atendé su opheshon. A base di e aanslag definitivo ku bo risibí pa e periodo di sinku aña stipulá, bo tin e posibilidat tambe pa entregá un opheshon formal. E promé aanslag definitivo ta pa 2014 i no tin posibilidat pa entregá opheshon mas riba e balor di e propiedat(nan) pa e añanan ku ta sigui, esta di 2015 te ku 2018.