Posibilidat di obheshon

Hasi un eskoho for di e sigiente "sub items":

Posibilidat di obheshon

Opheshon kontra di e balorashon

Manera stipulá e balor ku ta basá riba taksashon, Inspektor lo manda un karta pa e persona(nan) en kuestion. Den e karta aki e ta menshoná kiko ta e balor di e propiedat. Esun responsabel pa paga e OZB tin e posibilidat pa entregá argumentunan kontra e balor stipulá. E persona por skohe e manera ku e ke bringa e balorashon. Esaki tambe ta posibel usando e karta di opheshon Balor di taksashon. E por presentá ku dokumentonan relevante pa prueba su kaso. Por ehèmpel un rapòrt di taksashon resien relashoná ku e deseo pa bende e propiedat òf un petishon pa finansiamentu, kaminda e balor riba merkado ta mas abou ku esun stipulá pa Inspektor.

E posibilidat pa e pagadó di impuesto hasi konosí ku e no ta di akuerdo ku e balor, no ta publiká den e ordenansa. Esaki ta un inisiativa di Inspektor ku ta kontribuí pa yega na e balor korekto. Esaki pa evitá ku ta kobra aanslag ku no ta hustu.

Den kaso ku e Inspektor ta haña ku tin motibu bálido lo taksa e propiedat di nobo. Por sosodé ku Inspektor por pidi bo koperashon pa subi bo tereno i drenta bo edifisio pa por hasi un taksashon mas mihó posibel.

Opheshon kontra di un voorlopige aanslag di OZB

Por entregá un opheshon kontra di un voorlopige aanslag. Esaki tin ku sosodé denter di 2 luna despues di e fecha di e aanslag. Mester menshoná e motibu di e opheshon.

Bo por pidi dispensashon pa pago di e montante stipulá na momentu ku bo a entregá un karta di opheshon na Ontvanger.

E Inspektor ta atendé e karta di opheshon i lo informá bo por eskrito den un desishon di Inspektor. Si bo no ta di akuerdo ku e desishon di Inspektor, bo por hasi un apelashon na Raad van Beroep ku ta atendé kasonan di impuesto. Bo mester entregá e apelashon denter di dos luna despues di e fecha di e desishon di Inspektor. Mas informashon di esaki por lesa patras di e aanslagbiljet.

Por pidi Ontvanger dispensashon di pago durante e periodo di apelashon.

Opheshon kontra un aanslag definitivo di OZB

En prinsipio e mesun reglanan ku ta konta pa opheshon di un voorlopige aanslag ta konta pa esun definitivo tambe.

Adishonal ta konta lo siguiente:

Bo por entregá opheshon manera bo risibí e promé aanslag definitivo riba e propiedat pa e periodo di sinku aña stipulá. Opheshon ta posibel tambe ora stipulá un balor nobo a base di un kambio relativamente grandi, na momentu ku hasi e adaptashonnan den e aanslag definitivo.

Ora bo risibí e aanslagbiljet Onroerendezaakbelasting pa aña 2014 bo ta mira riba esaki e balor ku a stipulá pa bo propiedat inmóvil.  Si bo ta di opinion ku e balor stipulá ta muchu haltu, bo por entregá un karta di opheshon na Inspektor di Impuesto. Pa esaki bo tin un periodo di 2 luna  despues di e fecha menshoná riba e aanslag. Bo por usa e ehèmpel ku tin riba website via di e lenk aki OPHESHON aanslag OZB definitivo, pero bo por usa bo mes teksto tambe. Den e karta di opheshon bo por menshoná tur argumento kontra  e balor stipulá. Den e fase aki no ta nesesario pa laga un profeshonal traha un rapòrt di taksashon.

Den kaso ku Inspektor no ta di akuerdo ku e balor ku bo ta proponé,  inspektor lo notifikábo di esaki. Despues semper bo tin e posibilidat pa embolbí un profeshonal.

Pa e montante ku tin disputa riba dje bo por pidi dispensashon serka Ontvanger. 
Bo por usa e ehèmpel ku tin riba website via di e lenk aki PETISHON pa suspenshon di pago, pero bo por usa bo mes teksto tambe.  Mester paga e montante ku ta habrí denter di e término menshoná riba e aanslagbiljet. 

Despues ku kaba di atendé e opheshon, eventualmente tambe ora kaba di atendé e karta di apelashon, e balor di e propiedat ta bira opsoleto pa e periodo di sinku aña. Esaki ta nifiká ku no por entregá opheshon mas kontra di e aanslag definitivo pa e sinku añanan konserní. Lo deklará e kartanan di e tipo di opheshonnan manera esaki infundá.

Naar top